Duela 15.500 urteko "santutegia" aurkitu dute Deban

Debako (Gipuzkoa) Praile Haitz leizean balio handiko aurkikuntzak egin dituzte Aranzadi Zientzia Elkarteko arkeologoek: Madeleine aroko Cro-magnon gizakiaren hainbat tresna topatu dituzte, gutxi gorabehera orain 15.500 urte ingurukoak. Guztira 29 tresna aurkitu dituzte, baina balio berezia dute harri beltzean landutako lau idunekoek eta ahuntz hezurra oinarri duen bostgarren batek. Izan ere, orain arteko sasoi hartako aurkikuntza gehienak eguneroko bizitzan beharrezko ziren tresnenak izan dira, eta hauek, berriz, apaingarri hutsak dira. Leizea erritualetarako "santutegi" gisa erabilia izan zela uste dute adituek. Halako aurkikuntzarik gutxitan egin da Europan.