1994ean jaso zuen areto berak jaso ditu oraingoan Eduardo Arroyoren artelanak. Ia 25 urte igaro dira Bilboko Arte Ederren museoan Arroyori buruzko atzera begirako erakusketa jarri zuela. Atzera begirakorik ez oraingoan; XXI. mendean sortu dituen artelanak jarri dituzte ikusgai artistak 80 urte bete berri dituenean. Le retour des corisades margolana da sortu duen azkena: Ignacio Zuloaga artista eibartarraren Festako biktima (1990) margolanari egindako “parodia”. Bada, aurrez aurre jarri dituzten margolan biak, areto berean. “Nik Zuloagak azaldu ez zuen beste Espainia bat irudikatu dut nire koadroan; atsekabetutakoa, alegia”. Margolanez gain, Arroyok egindako eskulturak jarri dituzte erakusketan.
Espainiako egoera soziopolitikora lotuta dago Arroyoren obra. Frankismoaren aurka zuen jarreragatik Parisera jo zuen errefuxiatu gisa 1958an eta bertan garatu zuen artearekiko zuen zaletasuna. Hautsak harrotu zituen hasieratik: Frantziako hiriburuan, beste hainbat margolarirekin batera, 1960ean egindako erakusketa batek zeresan handia eman zuen, Los cuatro dictadores (Lau diktadoreak) irudikatu zituenean. Madrilgo Biosca galerian jarri zuten gero, baina Espainiako Gobernuak berehala zentzuratu zuten erakusketa. Norabide horretan, artistak espainiarren topikoak irrigarri uzten ditu bere lanetan: Doña Ines eta Don Juan Tenorio lanak dira horren erakusle.
