Enrique Urbizuk (Bilbo, 1962) Espainiako XXVI. Goya zinema sarietarako hamalau izendapen jaso ditu No habra paz para los malvados filmako lanagatik, eta horietako bi izendapen pelikula eta zuzendari onenarenak dira.
Pedro Almodovarrek hamasei izendapen jaso ditu, La piel que habito lanagatik; tartean, arestian aipatutako biak.
Film onenaren saria lortzeko hautagai dira, halaber, Blackthorn (Mateo Gil) eta La voz dormida (Benito Zambrano).
Urbizu 80ko hamarkadan hasi zen zinemagintzan, eta 1988an zuzendu zuen bere lehen filma: Tu novia esta loca. Denera bederatzi zuzendu ditu, guztiak ere gaztelerazkoak. Madrilen bizi da aspalditik.
Gregorio Muro donostiarraren Zeinek gehiago iraun film laburra animazio lanik onenaren saria lortzeko hautagai izendatu dute.
Sari banaketa otsailaren 19an izango da, Madrilen.
