EOS, Inma Shara eta Bilboko Koralaren kontzertua, Bilbon

Kontzertu berean elkartuko dira EOS Euskadiko Orkestra Sinfonikoa, Inma Shara orkestra zuzendaria eta Bilboko Korala. Datorren ostegunean, hilaren 8an eskainiko dute emanaldia, Bilboko Euskalduna jauregian. Bakearen aldeko Musika izena jarri diote kontzertuari. Izan ere, 2012a Bakearen eta Askatasunaren Kulturen Urtea izendatu du Eusko Jaurlaritzak, eta datorren urtean egingo diren beste hainbat ekitaldi iragartzeko edo horien sarrera gisa balioko du osteguneko emanaldiak.

Inma Shararen zuzendaritzapean, hainbat obra ezagun eskainiko dituzte EOSek eta Bilboko koralak. Giacomo Pucciniren Preludio sinfonikoa, Jesus Guridiren Hamar euskal melodiak eta Wolfgang Amadeus Mozarten Koroatze meza interpretatuko ditu EOSek. Musikariekin batera abestuko dute Bilboko Koraleko kideek, Julio Gergelyk zuzenduta. Halaber, beren ahotsak batuko dizkiete Andeka Gorrotxategi tenoreak, Damian del Castillo baxuak, Marta Urbieta sopranoak eta Maite Maruri kontraltoak.

Gernikako eta beste hainbat udalerritako bonbardaketen 75. urteurrena izango dela-eta hartu du 2012a Bakearen eta Askatasunaren Kulturen urtetzat Eusko Jaurlaritzak. «Etorkizunari begiratu» nahi dio Jaurlaritzak, Blanca Urgell Kultura sailburuak adierazi duenez. «Une honetan Euskadik itxaropenerako uneak bizi ditu, eta Eusko Jaurlaritzak zenbait jokaleku sortu nahi ditu, euskal gizarteak —sortzaileek zein herritarrek— askatasunez hitz egiteko modua izango duenjokalekuak». Kulturaren hainbat eremuk, musikarenak kasu, «balioez eta indarkeriaren aurka» hitz egin dezatela da Jaurlaritzaren helburua, Kultura sailburuak azaldu duenez.

Sarrerak, bi euroan

Ahalik eta jende gehien bil dadin, merke jarri dituzte kontzerturako sarrerak: bi euroren truke eskuratu ahalko dira emanaldirako txartelak.

Ohiko bideetatik erosi ahalko dira sarrerak: leihatilan —astelehenetik larunbatera 17:00etatik 20:00etara—, telefonoz 944-31 03 10 zenbakira deituta, BBKren zerbitzu anitzetako kutxa automatikoetan, eta Internet bidez, BBKren webgunean.