Euskarazko kultura ekoizpena aztergai Bilbon bihar eta etzi

Euskaraz bizi, sentitu, adierazi: kultura-eduki erakargarriak sortzeko bideak mintegia egingo da bihar eta etzi Euskal Herriko Unibertsitatearen Bizkaia aretoan, Bilbon, BizBAKen antolatuta. Eñaut Elorrieta musikariak, Ander Lipus antzerkigileak, Asier Altuna zinemagileak, Maialen Lujanbio bertsolariak, Katixa Agirre idazleak eta Estitxu Fernandez telebistako aurkezleak parte hartuko dute, eta euskaraz sortzeko eta adierazteko gakoak ematen ahaleginduko dira.

Mintegiak abiapuntu bat dauka: «Gainontzeko hizkuntza nagusiekiko harremanean euskaldunen komunitateak zailtasunak ditu, bai hasierako sormen prozeduran, eta baita sortutako kultura ekoizpenak hedatzeko unean ere». Hartara, helburua «euskarak dituen berezitasun eta baliabideak ezagutzea» da, eta «esparruz esparru lantzeko bideak garatzea».

Aipatutako sortzaile bakoitzak hitzaldi bat emango du, eta horietaz gain, Lipusek, Agirrek, Altuna eta Elorrietak mahai ingurua egingo dute bihar, 16:30ean, Euskarak zabaltzen dituen leihoak, ixten dituen ateak izenpean.