Familia barneko tirabirak

Berez bikote bitxia da Ben Stiller eta Robert De Nirok egiten dutena. Lehena komedia generoan egin da ezagun; bigarrena, berriz, azken hamarkadetako aktorerik garrantzitsuena izan da, normalean rol dramatikoak jokatuz. Baina 2000. urtean Stillerrek bere eremura eraman zuen De Niro, eta komedia giroan ere aritzen ahal zela erakutsi zuen aktore estatubatuarrak.

Urte horretan Jay Roach ezezagunak Meet The Parents zuzendu zuen. Hala ere De Nirorentzat ez zen lehen komedia izan. 90eko hamarkadaren erdialdean De Niro ibilbidean maldan behera zihoan, eta aktoreak beste norabide bat hartzea erabaki zuen. 1999an bere buruari trufa egin nahi izan zion, Harold Ramis zuzendariaren Analyze This-en. Orduko pantaila-kidea beste aktore komiko ezagun bat izan zuen: Billy Crystal.

Meet The Parents-ek arrakasta komertzial handia eskuratu zuen, 55 milioi dolarreko aurrekontua izan eta 300dik gora lortu zituen. Urte hartako diru-poltsarik handienen artean zazpigarrena lortu zuen Roachen filmak. Istorioa ez zen bereziki originala, Hollywoodeko screwball comedies klasikoen irakurketa berritua zen haren proposamena.

Greg Focker erizaina da, nahiko baldarra, baina bihotz onekoa. Pamekin ezkondu behar du; baina hori gertatu aurretik hainbat konpromiso bete behar ditu, horien artean ezkongaiaren gurasoak bisitatzea. Horrela ezagutuko du Pamen aita, CIAko agente ohi bat, harekiko susmo txarra izanen duena. Fockeren konpromisoak proba gogorrak gainditu beharko ditu.

Robert De Niro eta Ben Stillerren arteko kimikak ongi funtzionatu zuen, eta ikusleek oniritzia eman zioten italiar-amerikarraren erregistro berriari. Horiek horrela, ez da harritzekoa handik lau urtera Ray Roachek berak istorioaren jarraipena egitea.

Meet The Fockers lehena baino makalagoa zen; hala ere, komertzialki arrakasta handiagoa izan zuen, 80 milioiko aurrekonturekin egin eta 500dik gora poltsikoratu. Bigarren pelikula horretan, Stiller eta De Niroren ondoan, beste aurpegi ezagun batzuk agertu ziren, Dustin Hoffman eta Barbra Streisand, esaterako.

Bikien urtebetetzea

Zuzendari berri batek hartu du hirugarrenaren gidaritza. Paul Weitzen lehenengo lanak, American Pie nerabeentzako komediak, izugarrizko arrakasta izan zuen AEBetan. Haren ondoren egin dituenak, berriz, nahiko oharkabean pasatu dira. Hala ere, gisa honetako produktu bat aurrera eramateko nahiko aproposa ematen du Weitzek.

Hortik aparte, ez da berritasun handirik bilatu behar Little Fockers-en. Stiller eta De Niroren arteko harremanak istorioaren ardatz nagusia izaten segituko du, eta bigarrenean lan egin zuten Streisand eta Hoffman honetan ere agertuko dira. Horiekin batera, Jesica Alba aktore gaztea eta luxuzko bi gonbidatu berezi, Harvey Keitel eta Laura Dern aktore bikainak.

Hamar urte pasatu direnean, Gregek ez du aitaginarrebaren errezeloak uxatzerik lortu. Estutasun ekonomikoak pasatu dituzte Greg eta Pamek, baina erizain ohiak enplegu berria lortu du botika enpresa batean. Bikiak dituzte, eta, antza, ez dute haien artean arazo handirik.

Bikien urtebetetzea ospatzea erabakiko du bikoteak, eta, festa horretarako, familia osoari egingo diote gonbita, baita Kevini ere, Pamen mutil-laguna izandakoari. Familia osoa etxean dutela, Gregek aukera du etxeko zereginetan ongi moldatzen dela erakusteko. Baina Jacken begirada gainean sentituko du denbora osoan; berez, Greg gaixoa ez daoso lasaia, eta horrek are gehiago urdurituko du.

'LITTLE FOCKERS'

Zuzendaria: Paul Weitz.

Aktoreak: Robert De Niro, Ben Stiller, Jessica Alba, Owen Wilson, Dustin Hoffman, Barbra Streisand, Blythe Danner.

Herrialdea: AEBak.

Urtea: 2010.

Iraupena: 115 minutu.

Estreinaldia: Gaur estreinatuko dute Ipar Euskal Herrian. Ostiralean estreinatuko dute Hego Euskal Herrian.