Martxoaren 19tik 29ra izango da Korrika, baina aurretik Korrika kulturalaren XIX. edizioa iritsiko da Euskal Herriko hiri eta herrietara. Bost ekitaldi nagusi aurkeztu dituzte antolatzaileek.
Fausto, herritar eredugarri antzezlana
Galder Perezek zuzendutako Fausto, herritar eredugarri obra taularatuko dute estrainakoz. Kartzelan preso dagoen Faustoren istorioa kontatzen du lanak; protagonistak indultua lortuko du Madame Demokraziarekin ezkondu ostean. Hala, "ongizatearen bidea" hartuko du. "Antzerki panfletoa, kontzertua eta deskontzertua, komedia, tragedia eta performacea" da, Christopher Marloweren Fausto oinarri hartuta. Urtarilaren 29an emango dute lehenengo aldiz, Donostiako Antzoki Zaharrean. Ondoren, Burlatan, Gasteizen, Gernikan eta Bilbon izango da ikusgai.
Gosariak
"Dantza egiteko modu asko daude, iraultza egiteko modu asko dauden bezala". Gose taldeko Ines Osinagak hala definitu du Gosariak proiektuko aniztasuna. Eta ez da gutxiagorako ere. Izan ere, askotarikoa da egitasmoa. Joseba Sarrionandia idazleak egin ditu hitzak, Iñigo Arregi eta Juan Luis Goikolea artistista plastikoek burutu dituzte lana osatzen duten irudiak, eta Gose taldeak musikatu ditu hitzak. Aurreneko konzertua Bilbon izango da, hilaren 22an, Guggenheim museoan. Gero, Eskoriatzan, Donostian, Hendaian, Gasteizen, Igorren eta Iruñean joko dute.
Bertsolaritzaren sekretuak
XIX. mendean kokatuko dute Bertsolaritzaren sekretuak bertso emanaldia. Eta ez da kasualitatea. Garai horretako emakume bertsolariak ekarri nahi dituzte gogora. Joxepa Anttoni Aranberri Xenpelar-etik hasi, eta itzalpean egon diren emakumezko sortzaileak aterako dituzte argitara. Hernanin estreinatuko dute, otsailaren 22an. Iruñean eta Mungian ere izango da ikusteko aukera.
Hor dago ardoa
Mikel Garaizabal enologoak espektakulua eskainiko du ardoa ardatz hartuta. Zuzeneko musika, bideo sorkuntzak... multidiziplina izango da obraren erdigunea. Martxoaren 5ean izango da lehen emanaldia, Errenterian. Zallan, Gasteizen eta Lizarran eskainiko dute ondoren.
Txo, Mikmak Txikia
Pirritx, Porrotx eta Marimototsen Txo, Mikmak txikia ikuskizuna da haurrentzako ekitaldia. Plastikozko zabortegi bihurtzen ari da itsasoa antzerkian, eta balea bat gaixorik azalduko da hondartzan. Laguntzeko direnak eta ez direnak egingo dituzte pailazoek. Sondikan oholtzaratuko dute, hilaren 23an. Ostean, Izpuran eta Lodosan jokatuko dute.
