'Fauxto' karrusarekin amaituko du Hiru Punttuk toberari buruzko tetralogia

Datorren larunbat honetan zortzi, abenduaren 6an, estreinatuko du Hiru Punttu antzerki taldeak bere azken lana: Antton Lukuk idatzitako Fauxto karrusa. Karrusa Garaziko (Nafarroa Beherea) euskalkian tobera antzerki moldeari ematen dioten izena da, eta lan horren taularatzea baliatuko du Hiru Punttuk 2002an Lurra-rekin hasita moldatu duen toberari buruzko tetralogia amaitzeko.

Baionan aurkeztu dute gaur goizean antzerki lan berria, eta Hiru Punttuko kideek agertu dutenez, tetralogia amaitzeko aurreko lanekin -Lurra, Beltzeria eta Euscalduna- bildutako esperientziaren sintesia egin nahi dute. Ildo horretatik, berriro ere "dantzaren espaziora" itzuliko direla iragarri dute; hots, publikoan zirkuluan izango dela sujetaren inguruan.

Halaber, Fauxto-k bi oinarri dituela azaldu dute: Nafarroa Behereko inauteriko zirtzilaren pertsonaia, eta obraren mami den euskal kulturaren kontzeptuaren inguruko gogoeta. Hausnarketa hori lantzeko Faustoren mitoa baliatu du Lukuk.

Honako data eta lekuetan emango dute Fauxto:

Abenduaren 6an: arratseko zortzi eta erdietan Anhauzeko salan (Nafarroa Beherea).

Abenduaren 12an: arratseko bederatzietan, Domintxineko salan (Nafarroa Beherea.

Abendoaren 13an: arratseko zortzi eta erdietan Miarritzeko gaztetxean (Lapurdi).

Abendoaren 19an: arratseko bederatzietan Hazparneko Ttattola gaztetxean (Lapurdi).

*Litekeena da abenduaren 20an Itsasun (Lapurdi) ematea, baina zehazteke dago.