FICXixon jaialdiko zuzendariaren itzulera eskatu dute profesionalek

Zinemaren arloko 400 profesionalek sinatu dute Jose Luis Cienfuegos FICXixon Gijongo (Espainia) zinema jaialdiaren zuzendari izatera itzul dadila eskatzen duen agiria, eta sinatzaileen artean Atom Egoyan, Abel Ferrara, Todd Solonz, Montxo Armendariz, Fernando Trueba, Isabel Coixet, Iciar Bollain, Isaki Lacuesta, Pedro Almodovar, Alex de la Iglesia eta Unax Ugalde daude, besteak beste, Locarno, Marseilla eta beste hainbat hiritako zinema jaialdietako zuzendariez gain. Cienfuegos zuzendaritzara itzuli ezean jaialdiarekin ez dutela inolako loturarik izango adierazi dute.

Hamasei urtez zuzendu du Cienfuegosek FICXixon, eta «erreferentzia garrantzitsua» bihurtu du, sinatzaileek diotenez, baina Carlos Rubiera Gijongo Udaleko Kultura zinegotziak hura kargutik kentzea erabaki zuen joan den astean. Nacho Carballo zuzendari berriak egin dituen adierazpenek sinatzaileei pentsarazi diete jaialdiaren zuzendaritza talde berriak Cienfuegosek egindako lana alferrik galtzen utziko duela.