Foru Aldundia Guggenheimen ardura bere gain hartzeko prest dela dio Bilbaok

Bilboko Guggenheim museoan Eusko Jaurlaritza «eroso edo gustura ez badago» Bizkaiko Foru Aldundia museoaren zuzendaritza organoetan haren zeregina betetzeko prest dagoela adierazi du Jose Luis Bilbaok. Bizkaiko ahaldun nagusiaren hitzetan, «Jaurlaritza gustura ez badago, esan dezala, ez baita ezer ere gertatzen; Guggenheimek aurrera jarraituko du».

Guggenheimen gala afaria izan zen herenegun. Museoaren nagusiak, enpresa laguntzaileak, ohorezko kideak eta lagunak biltzen dira bertan, eta urteko ekitaldirik garrantzitsuena da museoarentzat, Bilbaoren esanetan. Horregatik, ekitaldira Jaurlaritzako ordezkaririk ez azaldu izana txarretsi du. «Estrategikotzat eta garrantzitsutzat daukatela diote, baina han ez zen inor egon».

Museoa handitzeko eta Urdaibain beste Guggenheim bat egiteko Aldundiaren asmoak bere horretan jarraitzen duela berretsi du ahaldun nagusiak. Asmo horri eusteko eta proiektuen lehiaketa hasteko eskatu zioten asteartean Bizkaiko Batzar Nagusiek Jaurlaritzari. Baina Jaurlaritzak esana du ez duela babesten proiektua. Jaurlaritzaren laguntzarekin edo gabe, proiektua «egin egingo da», Bilbaoren hitzetan. «Bere jarrerarekin, egin egingo dena atzeratzea baino ez da lortzen ari».