Deabru Beltzak taldeak hasiko du gaur 27. Antzerki Astea, Les Tambours de Feu ikuskizunarekin. Obra 21:00etan eskainiko du, kalean bertan. Ekainaren 1era bitartean, denentzako moduko antzezlanez gozatzeko aukera emango du jaialdiak.
Bihar, Ados Teatroa taldeak Emaztegaiaren semea antzeztuko du Aldats pilotalekuan (22:30); igandean, Lezoko Orratx taldeak Kale gorrian (Aldats pilotalekuan); hilaren 28an, asteartean, Aizarnako Eskola Antzerkiak Amona honekin...kontuz (Goaz aretoan); 29an, asteazkenean, Korri, Xalto eta Brinko pailazoek Dantzan ikuskizuna (Aldatsen); 31n, ostiralean, Durangoko Karrika Antzerki Taldeak Lurra Astinduz (Aldatsen); eta azkenik, ekainaren 1ean, larunbatarekin, Bertsoklown taldeak Final nagusia jokatuko du. Jokin Uranga, Iñaki Gurrutxaga eta Iñigo Izagirre bertsolariek parte hartuko dute saio horretan.
1986an hasi zen Goaz antzerki taldea antzerki astea antolatzen Deban, eta, ordudanik, euskaraz egiten den teatroaren erreferentzietako bat da.
