George Clooneyk zabalduko du Mostra gaur, 'The Ides of March' lanarekin

Veneziako 68. Mostrako alfonbra gorritik ibiliko da gaur George Clooney aktore eta zuzendari estatubatuarra. The Ides of March thriller politikoarekin zabalduko du jaialdia, eta zuzendariarekin batera Venezian izango dira filmeko aktorerik gehienak ere: tartean, Philip Seymour Hoffman, Paul Giamatti, Marisa Tomei eta Evan Rachel Wood. Gidatu duen laugarren filmarekin Urrezko Lehoia lortzeko beste 22 filmerekin lehiatuko da sail ofizialean, eta ez nolanahikoekin, gainera. Roman Polanski, David Cronenberg, Aleksander Sokurov eta Todd Solondz zuzendari beteranoen film berriak izango ditu aurrean, baita Steve McQueen eta Andrea Arnoldenak ere, besteak beste.

Carnage lanarekin iritsiko da Mostrara Polanski, Yasmine Rezaren antzezlanean oinarritu du filma, eta Jodie Foster, Kate Winslet, Cristoph Waltz zein John C. Reilly ditu aktore taldean, besteak beste. Cronenbergek, berriz, Keira Knightley, Viggo Mortensen, Michael Fassbender eta Vincent Cassel aukeratu ditu A Dangerous Method filmatzeko.

McQueenen bigarren filma, Shame, da ikusminik handien sortu dutenetariko bat. Sokurovek, berriz, Goetheren lanean «lerro artean» dagoena erakutsiko du Faust pelikulan, eta Emily Bronteren eleberria egokitu du Arnoldek Wuthering Heights-en. Beste nobela bat, John Le Carreren espioi eleberri bat egokitu du Tomas Alfredsonek Tinker, Tailor, Soldier, Spy lanerako, eta Colin Firth aukeratu du protagonistaren rolerako. Dark Horse aurkeztuko du Solondzek, eta Alpis, berriz, Yorgos Lanthimosek.

Zuzendari estatubatuarren artean daude Abel Ferrara 4:44 Last Day on Eart lanarekin, William Friedkin Killer Joe-rekin eta Ami Canaan Mann Texas Killing Fields-ekin. Johnnie To, Eran Kolirin, Sion Sono, Te-Sheng Wei, Ann Hui, Marjane Satrapi, Philippe Garrel, Cristina Comencini, Gian Alfonso Pacinotti eta Emanuele Crialesek osatzen dute sail ofizialean lehiatuko direnen zerrenda.