Bilboko Guggenheim Museoan Roberto Zearsolo administrazio eta finantza zuzendariak egindako lapurreta bezalako kasuak saihesteko asmoz, Museoaren kudeaketaren antolaketa aldatu egin dutela jakinarazi du gaur Josune Ariztondo Bizkaiko Foru Aldundiko Kultura sailburuak. Gaur hartu dute erabakia Eusko Jaurlaritzak eta Aldundiak -biek osatzen dute Museoko administrazio kontseilua-. Aldaketa horrekin, "neurriak zorroztu" dituztela esan du Ariztondok.
Zearsolok 486.979,38 euro lapurtu zituen 1997tik, eta Guggenheimeko arduradunak duela gutxi ohartu ziren horretaz. Kargutik kendu egin zuten lehengo astean hura.
Jaurlaritzak eta Aldundiak hartutako neurrien arabera, orain arte artelanen eta eraikinaren kudeaketa egin duten bi elkarteak Museoko Fundazioaren menpe egongo dira hemendik aurrera -autonomoak ziren-. Gainera, bi elkarte horiek urtero kanpoko finatza auditoria pasatu beharko dute. Horretaz gain, edozein ordainketa eta diru erabiltzean bi sinadura beharko dira, eta finantza saileko sei langilek kudeatuko dituzte diruak.
"Akatsen arriskua gutxitu egin nahi dugu", adierazi du gaur goizean Ariztondok, Bizkaiko Batzar Nagusietan bere kabuz egindako agerraldian.
Gaur arratsaldean, berriz, Miren Azkarate Jaurlaritzako Kultura sailburuak eta Jose Ignacio Bidarte Guggenheim Museoko zuzendariak agerraldia egingo dute Gasteizen, Eusko Legebiltzarrean.
Kultura
Guggenheim Museoko kudeaketaren antolaketa aldatu eta "zorroztu" egin dute
Orain arte artelanen eta eraikinaren kudeaketa egin duten bi elkarteak Fundazioaren menpe egongo dira hemendik aurrera, eta urtero pasatu beharko dute kanpoko finantza auditoria. Gaur hartu dute erabakia Eusko Jaurlaritzak eta Bizkaiko Foru Aldundiak.
Iruzkinak
Ez dago iruzkinik
Ordenatu
