Goethe Institut-en Bikaintasunerako Ekimenak proiektuak, Europako Batasunak eta beste 11 erakundek hauspotutako Europa (to the power of) egitasmoaren parte da San Telmoko erakusketa, eta Goethe Institutek berak eta Donostia 2016k ekoitzi dute. Erakusketa ibiltaria da, eta jada Oslon (Novergia), Lodzen (Polonia), Londresen (Ingalaterra), Bruselan (Belgika), Minsken (Bielorrusia), Istanbulen (Turkia) eta Novi Saden (Serbia) egon da. Dena den, toki batetik bestera aldatu egiten dira proposamenak.
Peio Agirre da Donostiako erakusketako komisarioa, eta ondoko artisten lanak aukeratu ditu: Sven Augustijinenak, Annika Erikssonenak, Iñaki Garmendiarenak, Lise Harlevenak, Ane Hjort Gutturenak, Oliver Klimpelenak, Aleksander Komarovenak, Asier Mendizabalenak, Jean Marie-Straub / Daniele Huilletenak, Xabier Salaberriarenak, Christian Teckertenak eta Katarina Zdjelarrenak.
Barbara Steiner Europa (to the power of) egitasmoaren zuzendariaren esanetan, "hainbat ikuspegik" osatzen dute Europa, eta erakusketako proiektu "gehienek" horri begiratzen diote.
Erakusketaz gain, martxoaren 7an, 13an eta 20an gaiarekin lotutako proiekzio batzuk emango dituzte museoko ekitaldi aretoan.
