Maiatzaren 20, 21 eta 22an egingo dute aurten Olatu Talka jaialdia, Donostia 2016 Kultur Hiriburutzaren barruan. Zazpigarren urtez, herritarrek eta eragileek aurkeztutako proiektuekin osatuko dute egitaraua, eta 150 proposamen baino gehiago jaso dituztela azaldu dute arduradunek. Horiek aztertzen eta nola gauzatu pentsatzen ari dira orain lantaldeko kideak, hirian zehar egitasmo guztiei tokia egiteko.
Aurten, herritarrek inoiz baino protagonismo handiagoa izango dutela azaldu dute, eta haiek hiriko espazioak eraldatzeko duten gaitasuna izango dela jaialdiaren ardatza. Hain zuzen, hiriko hainbat puntu kritikotan esku-hartzeak proposatu dituzte hainbat proiektu izango dira jaialdian. Udaleko Berdintasun eta Partaidetza sailek eta eragileek elkarlanean, hiriko puntu kritiko horiek identifikatzeko txostena egin zuten iaz, eta 41 puntu zehazten zituen mapa bat osatu zuten. Horietako batzuk eraldatzen eta "atseginago" bihurtzen ahaleginduko dira jaialdiaren bidez. Adibide gisa, Morlans, Egia eta Loiolako Erriberetan esku-hartzeak izango direla aurreratu dute.
