Miguel Leache artistak Uharteko Arte Garaikideko Zentroan "Por los días felices" izeneko argazki erakusketa ireki du. Nafarroan ateratako 92 argazki daude guztira ikusgai. Etxegabetze baten ondoren eta hurrengo biztanleak sartu aurreko unean erretratatzen ditu espazioak artistak, hots, hutsik dauden unean. Apirilaren 7ra bitartean egongo da zabalik erakusketa.
Bizilagunik gabe gelditu diren etxeen negatiboa ere erakutsi nahi izan du Leachek Uharten. Bost minutuko bideo bat sortu du horregatik, eraiki berri den Iruñeko auzo bateko irudiak bilduz. Oraindik inork erabiltzen ez dituen errotondak, ezer argitzen ez duten farolak ageri dira ikusentzunezko piezan. Hondea makinak joan, eta lehen biztanleak heldu arteko uneak erakusten ditu bideoak. "Objektuen bidez, jendearen bizitza erakutsi nahi izan dut", azaldu du artistak.
