John W. Cale (1938-2013) abeslari eta gitarrista oso estimatua zen, eta haren eragina suma daiteke Eric Claptonen lanean eta Dire Straitsen lehenengo diskoetan. Hain zuzen ere, Claptonek kantu oso arrakastatsu bilakatu zituen Calek idatzi eta grabatutako bi kantu: Cocaine eta After Midnight ospetsuak. Lynyrd Skynyrdek ere jo zuen pare bat aldiz Caleren kantutegira, eta Call Me the Breeze grabatu zuen, besteren artean. Eta Captain Beefheartek, Waylon Jenningsek eta Carlos Santanak ere grabatu zuten Caleren kanturen bat edo beste.
Gitarra jotzeko zuen modu pausatuagatik egin zen ezagun Cale. Gitarrista handia izan arren, ez zuen inoiz bere abilezia nabarmendu, eta bere kantuek jariotasun naturala erakusten zuten, gehiegizko birtuosismoari bizkarra emanez. Bluesean zuen oinarria, baina jazzari, rockabillyari, countryari eta popari ere lekua egin zien bere lanean
1972n kaleratu zuen bere lehenengo disko luzea, Naturally, eta gerora, bere estiloa definituko zuten beste hamaika lan argitaratu zituen: Really (1973), Okie (1974), Troubadour (1976), 5 (1979), Shades (1981), Grasshopper (1982), #8 (1983), Travel Log (1990), Number 10 (1992), Closer to You (1994), Guitar Man (1996), To Tulsa and Back (2004) eta Roll On (2009)
