Jorge Oteizaren jaiotzaren mendeurrena ospatuko dute 2008an

2008an beteko dira ehun urte Jorge Oteiza zena jaio zenetik (1908ko urriaren 21ean sortu zen, Orion, Gipuzkoan; eta 2003ko apirilaren 9an zendu, Donostian), eta hari buruzko mendeurren ospakizuna antolatu du Oteiza Museoak, gaur Iruñean jakinarazi duenez. Urte osoan egingo dituzte ekimenak eta, helburua, artistaren "legatua eta irudia aztertzea da".

Urrian egingo dute ekitaldirik nagusiena: Oteizari buruzko nazioarteko jardunaldia.

Jorge Oteizaren mendeurrenaren ekitaldiak

- Santiago Bideko Kaperari buruzko erakusketa. Proiektu arkitektoniko eskultoriko horri buruzko argitalpen baten edizioa. 2007ko azaroaren 29a-2008ko apirilaren 6a.

- Laboratorio Experimental (Laboratorio de Tizas)-i buruzko erakusketa eta azterketa. Laboratorio Experimental-en azterketa analitikoaren argitalpena. 2008ko ekaina-azaroa. Erakusketa Oteiza Museoan izango da.

- Oteiza Museoari buruzko liburuaren argitalpena. 2008ko maiatza.

- Ejercicios Espirituales en un túnel edizio kritikoaren argitalpena. 2008ko udazkena.

- Jorge Oteiza eta haren aroari nazioarteko jardunaldia. Nafarroako Unibertsitate Publikoaren Oteiza Katedraren lankidetzarekin. 2008ko urriaren 21etik 24ra. Jardunaldiaren helburua Oteizaren legatua azaldu eta zabaltzeaizango da. Ikerketarako material berriak sortzea da proiektuaren muina. Jardunaldiko batzorde zientifikoa: Camino Paredes (Nafarroako Gobernuko Kultura zuzendaria eta Oteiza Fundazioaren Patronatuko idazkaria), Txomin Badiola (artista), Amador Vega (Bartzelonako Pompeu Fabra Unibertsitateko Estetika irakaslea eta Quousque Tandem...!-en edizio kritikoaren arduraduna), Adelina Moya (EHUko Arte Ederretako Fakultateko irakaslea) eta Soledad Alvarez (Oviedoko Unibertsitateko irakaslea).

- Jorge Oteizaren obraren katalogo arrazoituaren gauzatzea. 2007ko azaroan hasi dute lana eta hiru urte beharko dituzte amaitzeko.

- La Escultura Dinámica argitalpena. 2008ko otsaila.