Los Van Van taldea Kubako musikaz hitz egitean derrigorrean aipatu beharreko erreferentzia da. 1969an sortu zen, Juan Formell baxuaren gidaritzapean, hain zuzen ere. Gaur hil da, Habanan, 71 urterekin, gibeleko gaitz baten ondorioz. "Gibelak ez zion ondo erantzuten, odolusteak izan ditu eta hemoglobina maila asko jaitsi zaio", adierazi dio Formellen semeetako batek Eferi.
Hogei disko eta 150 abesti baino gehiago kaleratu zituen Los Van Van taldeak. Besteak beste, 1997an urrezko eta platinozko diskoak lortu zituzten, eta 2000. urtean Grammy Latinoa eskuratu zuten.
Umorea eta ironia baliatuz, Kubako errealitatearen testuinguru soziala erabili zuten euren abestien letretarako. Azken urteetan, Latinoamerikako mugak gainditu eta Ingalaterra, Austria, Suitza eta Alemaniako agertokietan jo izan dute. Euren erritmo bizi eta alaiek dantza egitea gustuko ez zuenari ere dantza egiteko gogoa kutsatu zioten.
