"Urtean zehar egiten den lan isilaren fruitu" gisa, larunbatean abiatuko da Nafarroako Bertsolari Txapelketa, Iruñeko Katakrak kulturgunean. Osotara, 33 bertsolarik eman dute izena aurtengo edizioan, inoizko kopururik handiena. Aurten lehen aldiz izena eman duten sei bertsolariekin kanporaketa egin zuten pasa den abenduan, eta horietatik hiruk kantatuko dute larunbatetik aurrera egingo diren kanporaketetan. Azkenean, hortaz, 30 izango dira partaideak. Horien artean ez da izango Xabier Silveira egungo txapelduna.
Iruñean jokatuko da bost final-laurdenetan lehena. Irurtzunen, Zubirin, Lizarran eta Lakuntzan izanen dira gainerakoak. Final-laurdenak, ondoren, Berriozarren, Lesakan eta Burlatan jokatuko dira. Azkenik, zortzi bertsolari lehiatuko dira martxoaren 28an Elizondoko pilotalekuan egingo den finalean.Txapelketaren aurkezpenean, Lorea Arburua Nafarroako Bertsozale Elkarteko koordinatzaileak, azkeneko bi edizioetan bezala finala Iruñean egin ahal izateko ezintasuna nabarmendu du, "babes ekonomiko eta instituzional falta dela eta".
42.edizioa izango da aurtengoa. Horrek, Arburuak dioenez, txapelketa "errotutako eta ibilbide luzeko" ekimena dela erakusten du. Era berean, gaur egun "Nafarroan erreferente kulturala" dela azpimarratu du. Alde horretatik, "trasmisioaren indarra" nabarmendu du Arburuak, eta haur eta gazteen bertso eskoletan zein irakaskuntza formalean Bertsozale Elkarteak egiten duen lana goraipatu du. Lan horren fruitutzat hartu du gaur egun herrialdean kantuan ari diren bertsolarien papera, txapelketaren "ardatz" direna.
