Espainiako Zinema Akademiak lehen aukeraketa egin du Oscar sarien 88. edizioan ingelesez besteko film onenaren kategorian Espainia ordezkatzeko. Horien artean da Loreak. Irailaren 29an jakinaraziko dute hiru filmetako zeinek ordezkatuko duen Espainiako Estatua.
Adriana Ugarte eta Jesus Castro aktoreek eman dute erabakiaren berri. Magical Girl filmak Urrezko Maskorra eskuratu zuen Donostiako Zinemaldiaren iazko edizioan.
Adriana Ugarte eta Jesus Castro aktoreek ezagutarazi dituzte hiru film hautatuak, Madrilen egindako ekitaldi batean. Haiekin batera Eva Sanz del Real notarioa eta Antonio Resines Espainiako Arte eta Zientzia Zinematografikoen Akademiako presidentea egon dira.
Iazko irailaren 23an Donostiako Zinemaldiko Sail Ofizialean eman zutenetik, Jose Mari Goenaga eta Jon Garañok ondutako dramak kritika on eta sari ugari izan ditu. Besteak beste, Siberiako Zinema Jaialdiko filmik onenaren saria irabazi zuen, eta pelikula latino onenarena Palm Springseko zinemaldian. Espainiako film onenaren Sant Jordi saria ere lortu zuen. Tokioko Latin Beat jaialdian (Japonia), berriz, Nagore Aranburuk, Itziar Ituñok eta Itziar Aizpuruk ex aequo irabazi zuten emakumezko aktore onenaren saria.
