'Intemperies (babes bila)' liburuko pasarte batean esaten da nobela guztiak amodiozkoak direla. Eta amodioaren eta amodio ezaren zantzuak ere badaude Lourdes Oñaederraren liburu berrian, bere ibilbideko bigarren nobelan. Izenburuak latinezko terminoari egiten dio erreferentzia, ez gaztelaniazkoari, egileak aurkezpenean esan duenez. "Epeltasuna edo haren gabezia azaldu nahi nuen. Oso seguru nintzen izenburu hori jarri nahi nuela". Lucia da liburuko protagonista, donostiarra, hizkuntzalaria, 50 bat urte dituena. "Liburuan ez da gertatzen aparteko gauzarik, baina norberari gertatzen zaizkion gauza txiki horiek oso garrantzitsuak dira. Egunerokotasuna dago istorioaren oinarrian", esan du Oñaederrak.
Liburuaren kontrazalak honela dio: "Denbora desberdin ari da igarotzen. Luziak ez daki noiztik, noiz hasi zen denboraren desberdintasun hori, aldaparik gabeko igarotze hori, iraganetik orainera kolore aldaketarik gabe, bide laua, oharkabean pasatze hori lehenetikorainera, urteak laburtu eta minutuak luzatu, loditu egin balira bezala... Gorputza. Gorputzaren bestelakotze geldiezin hori. Ezinbestean, inevitably, inevitabilmente".
