MUSIKA. Argitaratu berriak

ANTONIO ZAMBUJO

'GUIA'

WORLD VILLAGE

Emozioak eragiteko gaitasunak musikaren dohainetako bat izan behar duela uste baduzu, entzun arretaz portugaldarraren laugarren hau. Berriro aipatu behar ditugu fadoa berritzen ari diren artista gazteak, eta hortxe kokatu beharko genuke Antonio Zambujoren jarduna. Oinarrian, egituran, mamian eta azalean, fado disko soila dirudiena azkar batean bihurtzen da, kantuak entzun ahala, harantzago joateko gaitasuna duen konposizio sorta. Eta hortxe dago koska, melodietan, hainbat moldaketatan eta kantuek atzean uzten duten zapore sarkorrean. Bestela, badakizue, ez da festa bat alaitzeko erabiliko zenukeen diskoa. Arretaz entzuteko lana, dudarik gabe. ANDONI TOLOSA

BIDE ERTZEAN

'DON INORREZ'

GAZTELUPEKO HOTSAK

Tolosako boskoteak sendo eusten dio soinu propioa lantzeari: pop dotorea, hitz ederrez jantzita. Joserra Senperenaren moldaketek espazio handiagoa eman diete giro desberdinei: horra hor Zurekin dantzatu nahi nuke, hari orkestra beroaz. Izenburua Jose Luis Otamendiren argitaratu gabeko poema batetik hartu dute; seigarren taldekidea ote da poeta azpeitiarra? Mikel Ibarguren (Zure ausentzia) eta Juanra Madariaga (Hutsik) dira beste poeta gonbidatuak. Imanol Ubeda da gainontzeko testuen sortzailea; San Josera bidean, Bost egun eman eta Lizarbakar leloetan taldearen espiritu goxoa sakontzen du diskoak, ukendu baten antzera. JOSEBA MARTIN

SWANS

'MY FATHER WILL GUIDE ME UP A ROPE TO THE SKY'

YOUNG GOD

Filth (1983), Cop (1984) eta Children of God (1987) entzun dituenak badaki musikak gozamena ez ezik izua ere eragin dezakeela. Disko bera ederra eta ia jasanezina izan daitekeela. Swansek erakutsi zuen, Michael Girak rock-noise zikin, dramatiko eta ia siniestroa atzean utzi eta The Angels Of Light-ekin folk gotikorako jauzia egin zuen arte. Orain, Swansen ibilbidea laburbil dezakeen disko batekin itzuli da. Hemen countryaren eta gospelaren arrastoak aurki ditzakegu, crescendo dramatikoak, loop-ez eta gitarrez osatutako collageak, letania epikoak, Nick Caveren erara, eta baita pieza maiestatikoak ere. Swans zer zen eta zer den ezagutzeko sarrera egokia. MIKEL LIZARRALDE