Igor Susaeta kazetariak landutako erreportaia argitaratuko du bihar BERRIAk. 90eko hamarkadatik New Yorkeko musikariekin grabatzen ditu Ruper Ordorikak bere diskoak, eta Haizea Garizumakoa (2009) bezala, Brooklyngo estudio batean grabatzen aritu da bere lan berria. "Ez dakit zehazki zergatik grabatzen dudan hemen, baina uste dut nire eginkizunen artean dagoela (…) Beste arlo batzuetan normala bada euskaldunak han eta hemen ibiltzea, musikan zergatik ez?", azaldu du Ordorikak.
New Yorkek "haratago joateko" aukera ematen duela nabarmendu du kantariak. Diskoak AEBetan grabatuz "beste bizipen bat sartzen dut nire esperientziaren zakuan, eta esango nuke bizipen horiek eragina dutela diskoetan". Halaber, hango musikarien jarrera goraipatu du. "Disko baten grabaketan sartzen dira eta jotzen dute hurrengo egunean hilko direla jakingo balute bezala. Hemen pasioa da jarrera. Hil ala bizikoa, beti. Ez dago berriketarik, no bullshit, beraiek esaten duten moduan. Jo. Baina jo!”.
Hiriaren soziologia ere hizpide izan du Ordorikak solasaldian. "Kanpotik homogeneoa dirudi, baina hona etorri eta gauza oso deigarriak ikusten dituzu. Hemen, Greenpointen, adibidez, bi eliza kristau dituzu. Kanpaiak aditzen dituzu, eta igande goizean andra-gizonak mezara joaten dira. 10 minutu ibilita, Puerto Ricon zaude. Hemen ez da desagertu jendeak jatorriarekiko sentitzen duen beharra. Amerikanizatu dira, baina neurri batean".
