Oskorrik Eguberrietako kontzertua emango du Iruñean ostiralean

Bigarren urtez, Iruñeko Eguberrietako kontzertua emango du Oskorri taldearen The Pub Ibiltariak abenduaren 17an, Iruñeko Peñen Federazioak eta Oskorrik antolatuta.Kontzertua Anaitasuna pabiloian izanen da, datorren ostiralean, 20:00etan. Sarrera doan izanen bada ere, Anaitasuna pabiloiko ateetan Paris 365 jantoki solidarioen aldeko dohaintzak jasoko dira.

Emanaldian hamazazpi herri kantu joko dituzte. Nafarroa osoko musika eskolek, bandek eta koruek Oskorrirekin batera prestatu dituzte kantuok.

Kontzertua, musikariak oholtza gainean eta jendea behean pantailaren laguntzaz kantari dela eginen da. Oskorriren The Pub Ibiltariak 13 CDtan bildutako 226 kantuko errepertorioa du. Alabaina, datorren ostiralean 17 kantu joko dituzte. «Iazko arrakasta kontuan hartuta, aurten ere Anaitasunan izanen gara, Nafarroa osoko banda eta musika eskoletako instrumentu guztientzat eginiko partitura erraz baina landuekin», azaldu dute Oskorrikoek.

Parte hartu nahi izan duten musika talde eta erakunde guztiei partiturak eta hitzak biltzen dituen CD bana bidali zien Oskorrik ikasturte hasieran, Gabonetako kontzertua presta zezaten.