Milaka lagun elkartu ziren atzo Sohütan, Zuberoan, Jean Louis Davant idazle eta euskaltzainak Rene Cassin giza eskubideen bultzatzailea omentzeko. Hiru oren inguru iraun zuen ikuskizunak, eta eguraldia lagun izan zuten bertan elkartutakoek.
98 aktore igo ziren oholtzara, pastorala antzezteko errejent berri baten gidaritzapean. Heldu den igandean eginen dute bigarren eta azken emanaldia, atzoko leku berean; hain justu,Sohütako elizatik hurbil kokatua den pastoral soroan.
Pastoralaren agerraldia 15:30ean hasi zen, baina goizetik ere izan zen zer egin, hala nola pastoraleko arizaleekin meza 10:30ean, aktore taldea kaleetan ibiltzea 11:30ean, bazkaria 12:00 eta 15:00ak artean eta afaria 20:30ean.
Bakearen aldeko ekintzaile
Baionan 1887. urtean sortu zen Cassin, Nizan bizi eta Parisen 1976an hil zen giza eskubideen bultzatzaile eta zaintzailea. I. Mundu Gerran larri zauritu zen; Nazio Batuen Erakundearen aurreko Nazioen Batzan Frantziako Gobernuaren ordezkari egon zen; Hitlerren eta nazismoaren arriskuez munduko gobernariak ohartarazi nahi izan zituen, baina inork ez zion arretarik jarri.
Frantziak 1940an gerra galdu ondoren, Charles de Gaulle jeneral buru egilearengana joan zen Londreserat; II. Mundu Gerra amaitu ondoren, egondako ikaragarrikeriak geroan saihesteko asmoz, Giza Eskubideen Aldarri Orokorraren moldatzaile nagusia izan zen; 1968an, Bakearen Nobel Saria eman zioten eta 1987an, Frantziak giza-handien goresgune Panteoira eramanarazi zituen haren gorpuzkinak.
