Pitten eta Tarantinoren Donostia

Quentin Tarantino eta Brad Pitt dira Donostiako 57. Zinemaldiko izarrik nagusietakoak -Inglourious Basterds filmaren zuzendaria eta aktorea dira, hurrenez hurren-, eta zoramena eragin dute gaur, jaialdiaren lehen egunean -dena dela, 20:00etan hasi da Zinemaldia-. "Gozatu egiten dut jendearen ondoan, baina nire bizitza pribatua gordetzea nahi dut", esan du arratsaldean, prentsaurrekoan, Pittek.

Tarantino atzo arratsaldean iritsi zen Donostiara, Pitt gaur eguerdian, eta 18:30etik aurrera prentsaurrekoa eman dute (BERRIA.INFOk zuzenean eman du; ikusi hemen); Lawrence Bender ekoizlea haiekin izan da.

"Atzera begiratu eta zorte ona izan dudala ikusten dut. Ibilbide interesgarria daukat, batzuetan okerrak eginda eta besteetan ez", iritzi dio Pittek.

Inglourious Basterds filmaz aipatu du errodajea "bikaina" izan zela, eta Tarantinorengandik asko ikasi zuela. Honek adierazi du zaila egiten zaiola "izarrekin lan egitea, taldearentzat hori arraroa dela eman dezakeen arren".

Edurne Ormazabal, Francis Lorenzo eta Barbara Goenaga dira irekiera galako aurkezleak (20:00etan hasi da). Gainera, aktore eta epaimahi ofizialeko kideek ere han daude. Atom Egoyan zuzendariak bertan aurkeztuko du Chloe filma. Das Weisse Band filmeak Fipresci saria eskuratuko du eta Margaret Menegaz ekoizlea izango da saria jasotzeaz arduratuko dena.