Raimundo Sarriegi konpositore donostiarra zendu zeneko mendeurrena beteko da aurten. Horren harira, Eresbil musikaren euskal artxiboak beraien webgunean hari buruzko informazio andana biltzen duen gunea abiarazi du. Konpositorearen biografiaz gain, haren jatorrizko partiturak zein egokituak, grabazio argitaragabeak, orduko Donostiari buruzko informazioa eta abar bildu dituzte. Informazioa zein musika hartzeko aukera ere badago. Besteak beste, Donostiako danborrada hasten duen Sarriegi martxaren grabaketa zaharrena aurki daiteke bertan, 1924. urteko San Sebastian egunekoa.
Jon Bagues Eresbileko zuzendaria eta Juan Karlos Izagirre Donostiako alkatea pozik agertu dira urteurrena dela-eta Sarriegiri buruzko weba zabaldu izanaz. Esan dute ez dela kasualitatea proiektua orain abian jarri izana, hiru egun baino ez dira-eta falta San Sebastian Eguna eta danborrada ospatzeko.
