Sektatik kanpo, oreka bila

Martha Marcy May Marlene Sean Durkin zuzendariaren lehen film luzea da, eta, pelikulak izan duen harrera ona ikusita, pentsatzekoa da ez dela azkena izanen. Aurretik Antonio Camposen Afterschool film independentearen ekoizlea izan zen Durkin, eta hori egin ostean ausartu egin zen zuzendaritzarako salto egiten.

2007an hasi zen filma izanen zenari bueltak ematen. Sektekin interes berezia zuen Durkinek, eta urteetako ikerketetako materiala gidoia ontzen hasteko erabili zuen. Horrez gain, gertuko lagun batek sekta batean izan zuen esperientzia latza kontatu zion; horrek ere balio izan zion bere proiekturako. Hasieran, Mary Last Seen izeneko film labur bat izan zen, baina hori Sundanceko zinemaldira bidali ostean, lortu zuen pelikula egiteko finantzaketa.

Hain zuzen ere, Sundancetik bertatik ailegatu zen filmarako bultzadarik handiena. Iazko jaialdian zuzendari onenaren sari garrantzitsua irabazi eta gero, asko izan dira filmak zein zuzendariak pilatu dituzten sariak. Ekoizpen independentea da Martha Marcy May Marlene; hala ere, dezenteko hedapena lortu du, iazko pelikula independente garrantzitsuenetakoa izateraino.

Marthak sekta batean eman ditu azken urteak, baina egoera horrek ez diola batere onik egiten ohartuko da. Hori dela eta, sekta utzi eta Lucy ahizparengana joko du, laguntza eske. Lucy eta Ted haren senarrarekin, bizimodu berri bat hasten saiatuko da, mundu burges arruntera moldatzen.

Baina buruak ez dio bakerik emanen, amesgaizto ugari izanen ditu, eta mehatxatuta sentituko da. Horrek guztiak okerrera eginen du norbait atzetik duela sinesten hasiko denean. Hortik aurrera, are arazo handiagoak izanen ditu, errealitatea eta ilusioa zer den bereizteko zailtasun larriak izanen dituelako.

'MARTHA MARCY MAY MARLENE'

Zuzendaria: Sean Durkin.

Aktoreak: Elizabeth Olsen, Brady Corbet, Hugh Dancy, John Hawkes, Sarah Paulson, Julia Garner, Louisa Krause.

Herrialdea: AEB.

Urtea: 2011.

Iraupena: 102 minutu.

Ostiralean estreinatuko dute Hego Euskal Herrian.