55. Grammy sariak banatu dituzte bart gauean Los Angelesen, eta The Black Keys taldeak irabazi du sari gehien: urrezko lau Grammy. Rock disko onenari (El Camino), rock abesti onenari (Lonely Boy), rock emanaldi onenari eta ekoizle onenari (Dan Auerbach) emandako sariak eraman ditu taldeak.
Mumford & Sons talde ingelesaren Babel izendatu dute iazko diskorik onena. Horrez gain, bideo luzerik onenaren saria ere eskuratu dute (Big Easy Express abestiarengatik).
Hiruna Grammy lortu dituzte Gotye, Skrillex, Jay-Z eta Kanye Westek; Frank Ocean, Chick Corea, Esperanza Spalding, Matt Redman eta FUNek, berriz, bina. Hain justu, FUNek irabazi du urteko abesti onenari saria, We Are Young kantari esker.
