Aurtengo zinemaldian Berlingo eta Canneseko film garaileak ikusi ahal izango dira. Terrence Malick-en The tree of live eta Asghar Farhadi zuzendari iraniarraren Jodaeiye Nader az Simin (Nadir eta Simin, banaketa bat) izango dira perla berezi horiek.
Baina beste film ezagun asko ere izango dira, nazioartean une honetan dauden film esanguratsuenetakoak izango baitira ikusgai. Esaterako, Michel Hazanavicius zuzendari frantziarraren The artist filmak ere Canneseko jaialdian aktore onenaren saria eraman baitzuen.
Horiez gain, honakoak ikusteko aukera ere izango da: Nicolas Widing Refn-en Drive, Cannesen zuzendari onenaren saria eraman zuena; Et maintenant on va où? Nadine Labaki-rena; Le Havre, Aki Kaurismäki finlandiarrarena; Martha Marcy May Marlene, Sean Durkin zuzendariarena; Pina, Wim Wenders-en zuzendaritzapean; eta Tyrannosaur, Paddy Considine-ren film britaniarra.
