Eduardo Txillidaren familiak jakinarazi duenez, Txillida-Leku ez dute berriro irekiko, eta museoa itxita geratuko da betiko. Hainbat erakunde publikorekin negoziazioetan aritu da Txillida sendia, baina ez dute akordiorik egin.
Jabetza pribatua izaten segiko du Txillida-Lekuk, eta familiak abenduan jada iragarri zuen modu horretan ezin zutela jarraitu, bideraezina zelako. Eskulturgilearen obrak, hala ere, bertan geratuko dira, eta ikerketarako erabiliko dituzte.
Blanca Urgell Eusko Jaurlaritzako Kultura sailburua "harrituta" geratu da senideen erabakiarekin. Harridura horren poderioz, hitz gogorrak izan ditu Txillidaren familiarekin. Hartu duten erabakia museoa irekita nahi zuten erakundeekiko "desleiala" dela iritzi dio Urgellek.
Museoaren itxierak bertan lanean ari ziren hogei langileak kaleratzea eragingo du.
