Urdaibaiko Guggenheim «errentagarria» da Bizkaiko Foru aldundiarentzat

Bizkaiko Foru Aldundiak Guggenheim Urdaibai proiektuaren garapena, bideragarritasuna, eragina eta iritzia ezagutzeko egindako azterlanaren arabera, «eragileak eta bisitariak proiektuaren aldekoago azaldu dira herritarrak baino, bai Bizkaian, bai Busturialdea-Urdaibaiko eskualdean». Azterlanak zehazten duenez, «iritzi horrek proiektuaren alde egiten du, eskualdeari ekar diezaiokeen gizarte eta ekonomia eraginak baloratzeko eskatzen denean».

Foru Aldundiak atera dituen ondorioetan nabarmentzen dute proiektua «inbertsio errentagarria» dela, eta «ikono berri» bihur daitekeela nazioarteari begira. «Eskualdea ekonomia eta gizarte arloan suspertzen lagun dezakeen elementua da».