Urrezko Globoetan 'The Artist' eta 'The Descendants' izan dira irabazle

Faborito zirenak saritu dituzte aurtengo Urrezko Globoetan. Michel Hazanavicius zuzendariaren The Artist film mutuak lortu du sari gehien: hiru guztira. Komedia onenaren saria eman diote, eta baita jatorrizko musika onenarena ere. Horrez gain, Jean Dujardinek irabazi du komediako aktore onenaren saria. Draman, sarituena Alexander Payneren The Descendants filma izan da, bi sarirekin. Film dramatiko onenaren saria irabazi du, eta George Clooney izan da dramako aktore onenaren sariduna. Horrekin batera, emakumezko aktoreen sarietan historiako pertsonaia ezagunen antzezlanak saritu dituzte. Meryl Streepek bere zortzigarren Urrezko Globoa lortu du emakumezko aktore onenaren sariarekin; izan ere, The Iron Lady filmarengatik saritu dute drama alorrean, eta Michelle Williams izan da emakumezko aktore onenaren sariduna komedian, My Week with Marilyn pelikulan.

Horretaz gain, zuzendari ezagunen lanak saritu dituzte; esate baterako, zuzendari onenaren saria Martin Scorseserentzat izan da Hugo 3D-n egin duen lehen filmarengatik. Animazioko film onena Steven Spielbergen The Adventures of Tintin izan da, eta jatorrizko gidoirik onenaren saria, berriz, Woody Allenen Midnight in Paris filmari eman diote. Bestalde, Cristopher Plumerrek irabazi du taldeko aktore onenaren saria(The Beginners), eta emakumezkoetan, berriz, Octavia Spencer saritu dute (The Help).

Madonna irabazleen artean

Telebistako saioen aurtengo irabazleak Modern Family umorezko saioa eta Homeland drama saioa izan dira. Downton Abbey mini-saioa ere saritu dute. Aktoreen artean, Kesley Gramer eta Claire Danes saritu dituzte draman, eta Matt Leblanc eta Laura Dern komedian. Sari banaketaren gaueko protagonistetako bat Madonna izan zen, haren Masterpiece lanak abesti onenaren saria irabazi baitzuen. Azkenik, Morgan Freeman aktoreari Cecil B. DeMille ohorezko saria eman zioten, bizi osoko lana omentzeko.