Zentsura mota guztiak salatzeko kultur jaialdia egingo da Bilbon

Mari Boine Norvegiako kantariren eta Amal Murkus abeslari palestinarraren emanaldiak izango dira Zentsura At! jaialdiaren ekimen garrantzitsuenetako bi. Musikari laponiarra da Boine, eta sami kulturaren enbaxadoretzat jotzen dute. Haren emanaldia hilaren 15ean izango da Bilboko BBk aretoan. Israelen bizi den artista palestinarra da Murkus, musika tradizionaleko ahots esanguratsuenetakoa. Hilaren 16an emango du kontzertua, leku berean.

Zentsuraren aurkako jaialdia da Bilbon egiten dena, eta seigarren aldia du aurtengoa. Bi musika kontzertu horiez gain, bestelako kultur adierazpideek ere lekua izango dute. Umida Ahmedova Uzbekistango argazkilariaren Women and Men - Fom Sunrise to Sunset erakusketa ikusgai egongo da Bilboko hainbat aretotan, eta ez jaialdiak irauten duen bitartean bakarrik, baita geroago ere. Uzbekistango biztanleen bizitza grabatzeagatik kriminalki auzipetzeko jazarpena jasan du argazkilari eta dokumental zuzendariak. Erakusketa BBK aretoan izango da aurrena (urriaren 11-17) eta ondoren honako aretoetan ikusi ahal izango da: San Ignazio udal aretoan (urtarrilak 10-28), Barrainkua udal aretoan (urtarrilak 31-otsailak 11), La Bolsan (otsailak 14-28), eta Begoñan (martxoak 1-15). Umida Ahmedova berari buruzko erakusketa zabalik egongo da Bizkaiko Batzar Nagusietako erakusgelan, hilaren 11tik 31ra.

Hitzaldiak eta mahai-ingurua

Vicent Sanchis kazetari eta komikilariak Bruguera argitaletxeak frankismoan jasandako zentsurari buruzko hitzaldia egingo du urriaren 12an, eta Ben Herson produktoreak hip hopak Afrikan duen egoeraz hitz egingo du urriaren 13an.

Jaialdian parte hartuko duten kideekin mahai-ingurua egingo da hilaren 15ean, EITBren egoitzan. Joan Mari Torrealdai kazetari eta euskaltzaina, Janne Hansen irakasle samia, Todd Lester estatubatuarra (Free Dimensionalen sortzailea), eta Roberto Torres irakasle espainiarra batuko zaizkie lehen aipatuei.