ZINEMA. Asteko estreinaldiak

'CHE, UN HOMBRE NUEVO'

ZUZENDARIA: TRISTAN BAUER. HERRIALDEA: ARGENTINA. IRAUPENA: 110 MINUTU.

Iluminados por el fuego pelikulan Malvinetako gerraren gaineko bere ikuspegia eman ondoren, oraingoan Tristan Bauer zuzendariak pertsonaia historiko batengana zuzendu du begirada. Kasu honetan, baina, dokumental bat egiteko. Filma egiteko, informazio berri eta interesgarri ugari bildu du, CheGuevararen alargunak eta semeek utzi dizkioten agiri orain artean ezezagunei esker neurri handi batean. Horrekin Che Guevararen inguruko alderdi berri bat erakusteko aukera izan du. Filmak dokumental onenaren saria eskuratu berri du Montrealgo Zinemaldian.

'LOS OJOS DE JULIA'

ZUZENDARIA: GUILLEM MORALES. AKTOREAK: BELEN RUEDA, LLUIS HOMAR, JULIA GUTIERREZ CABA, PABLO DERQUI, FRANCESC ORELLA, DANIEL GRAO. HERRIALDEA: KATALUNIA. IRAUPENA: 107 MINUTU.

Duela bost urte guztiz oharkabean pasatu zen El habitante incierto estreinatu zuen, eta honakoa bigarren film luzea du Guillem Moralesek. Julia eta senarrak Bellevuera joko dute, Juliaren ahizpa bisitatzera. Gaixotasun larri baten ondorioz, Juliaren ahizpa ia itsu zegoen, egin zioten ebakuntzak ez zion batere lagundu. Etxera ailegatzen direnean, ahizpak bere buruaz beste egin duela ikusiko dute. Juliarentzat kolpe latza izanen da; batetik, ahizparen galeragatik, bestetik, berak ere gaixotasun bera duelako.

'EASY A'

ZUZENDARIA: WILL GLUCK. AKTOREAK: EMMA STONE, AMANDA BYNES, CAM GIGANDET, STANLEY TUCCI, PENN BADGLEY, LISA KUDROW. HERRIALDEA: AEB. IRAUPENA: 93 MINUTU.

Bi pelikularekin institutu giroko komedietan aditu bihurtzeko bidean da Will Gluck. Iaz cheerleaders-en inguruko bat egin zuen, eta orain gazteen sexualitateari buruzko hau. Berez, ez da sexualitatea gai nagusia, baizik eta horren inguruan izaten diren esamesak eta hipokrisia. Herrixka bateko ikasle bat izan ez dituen harreman sexualak asmatzen hasiko da. Horrek hainbat ondorio ekarriko dizkio: batetik, sexu bereko ikaskideek mespretxatuko dute eta berari buruz gaizki esaka hasiko dira; bestetik, mutilek laguntza eskatuko diote, eta izan ez dituzten harremanak asmatzearen truke hainbat fabore eginen dizkiote.