'Lock Out'
Zuzendaria: James Mather, Stephen St. Leger. Aktoreak: Guy Pearce, Maggie Grace, Peter Stomare, Tom Hollander, Joseph Gilgun. Herrialdea: Frantzia. Urtea: 2012. Iraupena: 116 minutu.Zientzia fikzioa eta akzioa uztartu nahi izan dituzte zuzendariek balizko etorkizun batean girotuta dagoen istorio honetan. Espazioan dagoen espetxe esperimental bat da MS1, Lurretik aparte dago, eta bertan munduko 500 presorik arriskutsuenak daude. Prozesu berritzaile baten bitartez, lokartuta eduki ahal dituzte presoak. AEBetako presidentearen alaba bertara joanen da bisita batean, eta orduan matxinada bat sortuko da, espetxeko langileak eta gaztea bahituko dituzte presoek. AEBetako presidenteak preso ohi bat bidaliko du alaba erreskatatzera. Luc Besson frantziarraren ekoizpen garesti horietako bat da filma.
'Act of Valor'
Zuzendaria: Mike McCoy,Scott Waugh. Aktoreak: Roselyn Sanchez, Timothy Gibbs, Emilio Rivera, Jason Cottle, Nestor Serrano. Herrialdea: AEB. Urtea: 2012. Iraupena: 111 minutu.AEBetako armadak gazteen errekrutamendua sustatzeko erabiltzen dituen bideen artean, pelikulak egitea dago, eta Act of Valor hau horien barruan dago. Helburu garbia du filmak, armadaren «balioak» loriatzea; hortaz, ez espero pelikula kritiko edo antimilitaristarik. Navy Seals delako taldea elite talde bat da AEBetako armadaren barruan.Horko kideak dira filmeko protagonista: CIAko agente sekretu bat preso hartu dute, eta taldekideen misioa hura salbatzea izanen da. Jakin badakite ez dela batere misio erraza gertatuko, baina teknologia modernoa dute lagun zeregin horretarako.
'Wanderlust'
Zuzendaria: David Wain. Aktoreak: Jennifer Aniston, Paul Rudd,Malin Akerman, Ray Liotta.Herrialdea: AEB. Urtea: 2012. Iraupena: 98 minutu.Udarekin batera, Jennifer Anistonen urteroko komedia ailegatu zaigu. Oraingoan, Paul Rudd du ondoan, eta bigarren mailako roletan, Ray Liotta eta Justin Theroux. David Wainek, zuzentzeaz gain, gidoia idatzi ere egin du, Ken Marinorekin elkarlanean. George eta Linda Manhattanen bizi dira, estresak jota. George lan egiten duen enpresatik kaleratuko dute, eta orduan Atlantara egitea erabakiko dute, haren anaia jasangaitzarengana. Baina bidean Elysium izeneko komunitate bat ezagutuko dute: hango kideek dirua eta ondasun material guztiak mespretxatzen dituzte. George eta Lindarentzat erabateko aldaketa egiteko aukera izanen da komunitate espiritual hori.
