Hugo Cabret
Zuzendaria: Martin Scorsese. Aktoreak: Asa Butterfield, Chloe Moretz, Ben Kingsley, Sacha Baron Cohen, Jude Law, Emily Mortimer, Michael Stuhlbarg, Ray Winstone, Christopher Lee. Herrialdea: AEB. Urtea: 2011. Iraupena: 127 minutu.
Ipar Euskal Herriko aretoetara ailegatuko da Martin Scorseseren azkena. Zinemagile beteranoak bide berriak urratzen segitzen du, eta, oraingoan, familia osoarentzako abentura pelikula egin du. Horrekin batera, lehen aldiz hiru dimentsioetan filmatu du, formatu horri beharrezko duen prestigio apur bat emanez. Brian Selznicken liburu batean oinarrituta, Hugo Cabret-ek izen bereko umezurtz baten istorioa du kontagai, iazko mendeko 30eko hamarkadako Parisen. Apurtuta dagoen robot bat konpontzen saiatuko da, eta orduan abentura misteriotsu bat hasiko da. Handik gutxira neska bat ezagutuko du, hark izanen du robotaren misterioaren giltza. Filmak oso kritika onak izan ditu AEBetan, eta dagoeneko hainbat sari garrantzitsutarako izendapenak jaso ditu.
Straw Dogs
Zuzendaria: Rod Lurie. Aktoreak: James Marsden, Kate Bosworth, Alexander Skarsgard, Dominic Purcell, James Woods, Rhys Coiro, Billy Lush. Herrialdea: AEB. Urtea: 2011. Iraupena: 100 min.
Sam Peckinpahek 1971n estreinatu zuen Straw Dogs, Dustin Hoffman eta Susan Georgerekin. Orduan filmak polemika handi samarra eragin zuen, gehienbat bortizkeria jasotzeko zuen modu gordinagatik. 40 urte pasatu diren honetan, Hollywoodeko nagiek bertsio berria egitea erabaki dute, jakinik gaur egun ez duela inolako polemikarik piztuko. Zientzialari estatubatuar bat eta haren emaztea Erresuma Batuko herrixka batera joanen dira bizitzera. Lasaitasunaren bila eginen dute hara, baina laster hainbat herritarren biolentzia ezagutuko dute. Egoera horretan, berez baketsua den zientzialariak oso erreakzio bortitza izanen du.
Alvin and the Chipmunks: Chip-Wrecked
Zuzendaria: Mike Mitchell. Herrialdea: AEB. Urtea: 2011. Iraupena: 92 minutu.
Lehenengo bi pelikulek ez zuten aparteko arrakastarik izan, baina, Gabonak gisa honetako filmetarako oso aproposak direnez, hemen da Alvin eta urtxintxen hirugarren abentura sorta. Oraingo honetan, luxuzko itsas bidaia batean hartuko dute parte, eta bidaia horretan irla bakarti batera ailegatuko dira. Hainbat bidetatik saiatuko dira etxera itzultzen, baina denek huts eginen dute. Bitarte horretan irla hori ez dela horren bakartia konturatuko dira Alvin eta lagunak.
