'Yogi Bear'
Zuzendaria: Eric Brevig. Herrialdea: AEB. Urtea: 2010. Iraupena: 80 minutu.
50eko hamarkadan sortu zuen Hanna-Barbera etxeak marrazki bizidunetako klasiko hau. Hortik aurrera mundu osoko haur eta gaztetxoen artean oso arrakastatsu bihurtu ziren Yogi hartzaren abenturak. Orain, zinemak bere egin nahi izan du telesailaren xarma, eta historia luze eta aberats bat 80 minututara mugatu nahi izan du. Hiru dimentsiotan ikusteko aukera izatea da animazio film honek eskaintzen duen nobedaderik handiena; hortik aparte, gauza berri askorik ez dago.Yogi hartza da protagonista nagusia, lasai-lasai bizi da Yellowstoneko natur parke handian. Harekin batera, Boo-Boo bere lagun banaezina eta Smith eta Jones basozainak. Lasaitasun hori amaituko da dokumental bat egin nahi duen zuzendari bat parkera joatean. Pelikula hau gehienbat haurrentzat da, eta nahiko kritika txarrak jaso ditu AEBetan estreinatu ondoren.
'Saw 3D: The Final Chapter '
Zuzendaria: Kevin Greutert. Aktoreak: Tobin Bell, Costas Mandylor, Betsy Russell. Herrialdea: AEB. Urtea: 2010. Iraupena: 90 minutu.
Saw saila zazpigarren atalera ailegatu da, eta izenburuak dioena egia bada, hau izango da azkenengoa, baina auskalo. Gezurra badirudi ere, frankizia ezin errentagarriagoa izaten segitzen du, eta ikusteke dago ia ekoizleek nahiko duten hori bukatu. Berriro ere, Kevin Greutert jarri da kameraren atzealdean, berak filmatu zuen aurreko Saw, eta, zituen eszena gordinen ondorioz, Espainian X sailkapenean sartzea erabaki zuten. Polemikarik gabe estreinatuko da hau, baita aldaketa handiegirik gabe ere. Hori bai, hiru dimentsiotan ikusten ahalko dira odol jarioak. Jigsaw ondorengoak borrokaldi krudel batean murgildu dira, eta egoera horretan pertsonaia berri bat agertuko da: Bobby Dagen misteriotsua. Batzuek harengan jarriko dute konfiantza osoa, baina laster batean konturatuko dira Dagenek oso intentzio maltzurra duela.
'Secretariat'
Zuzendaria: Randall Wallace. Aktoreak: Diane Lane, JohnMalkovich, Scott Glenn, James Cromwell. Herrialdea: AEB. Urtea: 2008. Iraupena: 98 minutu.
Zaldien mundura hurbildu da Randall Wallace pelikula honetan, epika dosi handia duen film batean. Koro Hirukoitza zaldi lasterketen sari preziatuaren 1973ko zaldi irabazlearen istorioa kontatzen du pelikulak, haren hezitzaileen bitartez. Aita gaixotu egingo da, eta Penny Cheneryk familiarena den zaldi taldea hartuko du bere kargu, Virginian. Baina berehala konturatuko da zaldien inguruan ez dakiela gauza gehiegirik, ez nola zaindu, ezta horiek nola prestatu ere. Zorionez, entrenatzaile beterano baten laguntza topatuko du, eta bien artean lortuko dute zaldietako bat txapeldun bihurtzea. Secretariat Randall Wallaceren hirugarren film luzea da. Aurretik The Man in the Iron Mask eta We Were Soldiers zuzendu ditu eta Braveheart-en gidoia idatzi zuen.
