ZINEMA. ESTREINALDIAK. Independentzia Hollywoodera

Bi film aski izan zaizkie Jay eta Mark Duplass anaiei AEBetako komedia independenteko erregeen izendapena eskuratzeko. Mumblecore delako azpigeneroaren barruan sailkatu izan dute haien lana: aurrekontu txikiak, filmak banatzeko modu alternatiboak, pertsonaiek hitz egiteko duten modu berezia... Hala ere, duplasstarrei ez zaie etiketa hori sobera gustatzen.

Film laburren zirkuitu independentean hasi ziren bi anaiok, baina 2005. urtean Berlingo zinemaldiko film labur onenaren saria irabazi zuten. Horrek aukera eman zien lehen film luzea egiteko, urte bereko The Puffy Chair. Handik hiru urtera, beste komedia sailkaezin bat egin zuten: Baghead. Lau sosekin egindako filmak izan ziren bi horiek; hala ere, horiei esker nolabaiteko ospea irabazi zuten Duplass anaiek. Orain, film berri honekin gauza handiagoak ere egiten ahal dituztela erakutsi nahi dute.

Izan ere, lehen aldiz aktore ezagunekin egin dute lan. Protagonista nagusia John C. Reilly da; zuzendariek aktore hori zuten buruan Johnen rola idatzi zutenean. Reilyk baiezkoa eman zuen, eta, orduan, emakumezko aktorea bilatzeari ekin zioten. Marisa Tomeiren fitxaketarekin, ikusi zen Cyrus aurrerapauso garrantzitsua zela Duplass anaien ibilbide artistikoan.

Baina apustua ez da soilik zuzendariena izan. Atzean dirua arriskatu duen ekoizle bikote ospetsu bat dago, Tony eta Ridley Scott. Horiek egin dute New Orleansen jaiotako bi anaien umorearen aldeko apustua, eta beste behin ere asmatu dutela ematen du. Filma udan estreinatu zen, AEBetan, eta oso kritika onak izan zituen.

John etsita dago bere emazte ohiak eta lagunik onenak ezkontzea erabaki dutelako. Halako batean, Molly ezagutuko du, eta berarekin guztiz maiteminduko da. Bien arteko harremana zaila izanen da, oztopo handi bat dagoelako tartean, Mollyren seme Cyrus. Amaren eta semearen artean erlazio bitxia dago, eta John eta Mollyren artekorako traba bihurtuko da.

'CYRUS'

Zuzendaria: Jay eta MarkDuplass.

Aktoreak: John C. Reilly, Jonah Hill, Marisa Tomei, Catherine Keener, Matt Walsh.

Herrialdea: AEB.

Iraupena: 91 minutu.

Iraupena: Ostiralean estreinatuko dute Hego Euskal Herrian. Ipar Euskal Herrian irailean estreinatu zuten.