Joan den ostiralean, bi lurrikarak astindu zuten Indonesiako Sulawesi irla —6 gradukoa lehena, eta 7,4koa bigarrena—, eta jarraian etorri zen tsunamia, sei metro arteko olatuekin. Palu hiria jo zuten gogorren seismoek eta olatuek. Han, 16.700 pertsona atera behar izan zituzten etxetik.
"Hiria erabat hondatuta geratu zen", esan dute lekukoek. Petobo auzoa jo du gogorren hondamendiak; han, 700 inguru dira hildakoak. Denera, ordea, 1.200etik gora lagun hil dira, eta dozenaka desagertu. Zaurituak, berriz, 540 direla zehaztu dute iturri ofizialek.
Erreskate taldeek lanean jarraitzen dute, baina, lau egunen ostean, gune askotara ez da oraindik laguntzarik heldu. Hori dela eta, ohartarazi dute hildako kopuruak gora egin dezakeela. "Komunikazioa mugatua da; ez daukagu behar adina makinarik eroritako eraikinen artean begiratzeko", azaldu du Sutopo Purwo Nugrohok, Hondamendietarako Larrialdi Agentziako arduradunak.
