Damaskon (Sirian) bi leherketa izan dira goizean eta, gutxienez, 40 lagun hil eta 55 zauritu dituzte. Bi eraso suizidak hiriburuko Segurtasunerako eraikin nagusien ondoan gertatu dira, 10:00ak aldera.
Siriako Sana albiste agentziak leherketen atzean Al Qaeda zegoela adierazi du hasiera batean, baina oposizioak Bachar Al Asad Siriako presidenteari egotzi dio ardura, Arabiar Ligako behatzaileak "nahasteko" helburuarekin. Oposizioaren esanetan, "Al Asaden erregimenak arrisku bati aurre egiten ari dela erakutsi nahi du eta ez herri altxamendu bati".
Arabiar Ligako behatzaileak atzo iritsi ziren Siriara Damaskok indarkeria baztertu duela ziurtatzeko helburu nagusiarekin. Gune gatazkatsuetan «libreki» ibiliko direla adierazi du Ahmed ben Heli erakundeko idazkariordeak. Gainerako nazioarteko behatzaileak iritsi aurreko prestaketak egingo dituztela gaineratu du. Halaber, ospitaleak eta kartzelak bisitatu ahal izango dituzte, eta oposizioko eta giza eskubideen aldeko erakundeekin bildu.
Martxoan protestak hasi zirenetik 5000 lagun hil ditu gobernuaren errepresioak, NBEaren arabera.
