Afganistanen bederatzi lagun hil dituzte talibanek eraso batean

Talibanek gutxienez bederatzi pertsona hil eta hamasei zauritu dituzte Afganistango hiriburuan, Kabulen, herrialdeak Erresuma Batuarekiko independentzia lortu zuen egunaren urteurrenean —1919an lortu zuen—. «Eraso hau talibanek inbaditzaile britainiarrei eta Kabulgo Gobernuari bidaltzen diegun mezua da, berriro ere independenteak izango garela gogorarazteko», adierazi du Sabiula Mujahid talibanen bozeramaileak.

British Councilen —Erresuma Batuko hizkuntza eta kultura zabaltzeaz arduratzen den erakundea— egoitzari egin diote eraso. Lehendabizi kamioi bat leherrarazi dute, eraikinera sartu ahal izateko, eta ondoren autoz sartu dira. Leherketaren ondoren, Polizia eta NATOko soldaduak joan dira lekura, eta, borrokan aritu ondoren, erasotzaile guztiak hil dituzte.

Zortzi hildako Afganistango poliziak dira, eta bestea, berriz, Zeelanda Berriko soldadu bat. Une horretan eraikinean lanean ari zirenak, dena den, onik atera dira.