Oporrak antolatzeko garaia izaten da uda aitzina, baina koronabirusak, ordea, erabat baldintzatuko dut aurtengo uda, eta ikusteko dago atzerrira bidaiatzerik izango ote den. Alemaniako Gobernuak, erraterako, mezu argi bat zabaldu die herritarrei: ezingo dira atzerrira joan oporretan. Halakoetarako aukerarik gabe, Alemania barneko turismoa sustatuko du Merkelen gobernuak. Herrialde barneko turismoak ere nabarmen pairatuko du koronabirusaren eragina. Orain arteko higiene neurriak mantendu beharko dira, eta urruntze soziala ere errespetatu beharko dute herritarrek.
Heiko Maas Alemaniako Atzerri Gaietarako ministroak joan den astean bidali zien mezu bat herritarrei, eta asteburuan egindako elkarrizketa batean nabarmendu du ezin dela inolaz ere turismoa behar baino lehen sustatu. «Ezin dugu onartu Europa mailan lehiaketa bat egitea bidaia turistikoak nor lehenago antolatu», erran du.
Maasek oroitarazi du turismoa izan dela koronabirusaren hedapen azkarraren eragileetako bat, eta nabarmendu du mundu osoko eskiatzaileak jasotzen dituen Austriako Ischgl eski estazioa izan dela birusaren hedapen guneetako bat. Alemaniaren kontra, Austria datozen asteetan hasiko da muga irekitzen bidaia turistikoetarako.
Orain arte 55.193 kutsatu eta 5.750 hildako izan dira Alemanian. Bertze herrialde batzuekin alderatuz, konfinamendu arinagoa ezarri dute bertan, eta, dagoeneko neurri murriztaile batzuk kendu dituzten arren, Alemaniako Gobernuak arreta ez galtzeko eskatu die herritarrei, birusaren bertze olde bat irits daitekeelakoan.
