Amaitu dira Hego Korearen maniobrak Itsaso horian, baina tentsioa maila gorenean dago

Ipar eta Hego Korearen arteko tentsioak gora egin du berriro azken orduetan, Hego Koreak Itsaso Horian beste maniobra militar batzuk egin ostean. Ipar Koreak azaroan eraso egin zuen lekutik gertu hasi ditu, Ipar Koreakin duen mugatik gertu. Orduko horretan ere maniobra militar batzuei erantzunez eraso egin zuen Ipar Koreak, eta nazioartea jada hasi zaio Ipar Koreari eskatzen ez dezala modu berean erantzun orain.

Ordu gutxi batzuk iraun dute maniobrek, baina Ipar Korearen erantzunaren beldur, Yeonpyeong uharteko biztanleei bunkerretan sartzeko eskatu die Hego Koreak. Txinak eta Errusiak gogor kritikatu dute Hego Korea, baina AEBek bere babesa eman diote. Izan ere, Ipar Koreak jada iragarri du aurretik probokaziotzat hartuko zituela maniobrak, eta erantzuna oraingoan "hilgarriagoa" izango zela aurreratu du.

Bitartean, Nazio Batuen Erakundearen Segurtasun Kontseiluko bileran ez dira ados jarri krisi honetan hartu beharreko neurrien inguruan, beto eskubidea duten bost herrialdeak ez baitira ados jartzen erruduna nor den erabakitzerakoan. Zortzi orduko bilera izan da. Krisi honetan Hego Korearen aliatu dira AEBak eta Japonia. Errusiak eta Txinak, berriz, Ipar Korearen aldeko jarrera dute.

Wang Min Txinak NBEan duen ordezkariak Ipar eta Hego Korearen arteko gerra "tragedia" izango litzatekeela esan du, eta munduaren parte horretan dagoen oreka hautsiko lukeela. Egoera "arriskutsua" dela aitortu du, eta bi herrialdetako agintariak modu berean tratatu behar direla gaineratu du.