Larrialdiko egoerari emandako behin-behineko erantzuna. Horrela azaldu dute Austriak eta Alemaniak errefuxiatuei bi egunez ateak zabaltzeko hartutako erabakia. Baina Vienak iragarria du egoera lehengora itzuliko dela apurka, alegia, mugetako kontrolak berriz ezarriko dituztela egun gutxiren buruan. "Larrialdiko egoera bati aurre egiteko neurrietatik normaltasunera itzuli behar dugu", nabarmendu du Austriako kantziler Werner Faymannek.
Joan den ostiralean zabaldu zituzten mugak Austriak eta Alemaniak, Siriatik ihes egindako milaka pertsonari laguntzeko asmoz. Geroztik, 14.000 errefuxiatu eta asilo eskatzaile inguru jaso dituzte.
Bitartean, beste milaka Greziako Lesbos uhartean daude kontinentera eramango dituen ontziaren zain, handik Europa mendebaldeko estaturen batera joateko.
