Constituim taldeak ondu du konstituzio proposamena, aurretik eginiko hiru zirriborroren gainean osatua. Egileek aintzat hartu dituzte Santi Vidal epaile zigortuak zuzendutako Unanovaconstitucio.cat proiektua, Oriol Vidal Aparicio Konstituzio Zuzenbideko eta Zientzia Politikoetako irakasleak zuzendutako Constitucio.cat egitasmoa eta Independentziaren aldeko Ingeniariak taldeak eginikoa. Gaur aurkeztu diote Kataluniako Legebiltzarreko presidente Carme Forcadelli.
Bilduta daude oraintxe Constituïmeko 17 lagunak Carme Forcadell Kataluniako Parlamentuko presidentearekin @berriapic.twitter.com/nfhi1iRkM8
— Saioa Baleztena (@SaioB) 2016(e)ko maiatzak 11
Internet bidez, herritarren milaka ekarpen jaso dituzte azken hilabeteetan, eta 148 artikulutan laburbildu dute konstituzio proposamena.
Vilaweb atariak zabaldu du agiria: proposamenaren arabera, Katalunia "zuzenbide estatu aske, burujabe, demokratiko, sozial, ekologikoa" da, eta Kataluniako herriari dagokio burujabetza. Estatu hori "errepublika herritar eta parte hartzailea" litzateke.
Hizkuntzei dagokienez, katalana hizkuntza ofiziala eta nazionala da, kataluniar guztiek jakin beharrekoa. Herritar guztiek izan behar dute hura erabiltzeko eskubidea, eta erakunde publikoei dagokie hura babestu eta sustatzea. Gaztelaniak, berriz, "estatus juridiko berezia" luke, "ondare kultural" den heinean, eta hura ere "errespetatu, bermatu eta babestu" beharko litzateke. Aranera, berriz, ofiziala litzateke Aran bailaran nahiz Katalunia osoan.
Bailara horrek aitortua luke izaera nazionala eta erregimen juridiko berezia. Bere etorkizuna libreki determinatzeko eskubidea luke, konstituzio proposamenaren arabera.
Armada izan beharrean, segurtasun agentzia bat eta gatazkak konpontzeko nazioarteko institutu bat sortzea aurreikusten du testuak. Gainera, konstituziotik eratorritako legeriak zehaztuko luke Kataluniak nazioarteko defentsa erakundeetan parte hartu beharko lukeen, NATOn kasurako. "Armada klasikoen ideia zaharkitua" gainditu nahi dute horrela, dokumentuaren egileek azaldu dutenez.
Estatu akonfesionala
Ezein erlijiok ez luke izaera ofizialik izango, eta errepublikako presidentea gobernuko lehendakaria izango litzateke. Bost urtero aukeratuko lukete presidentea, eta gehienera behin errepikatu lezake karguan. Parlamentua litzateke maila nazionalean ordezkaritza ganbara bakarra, eta diputatuak bost urtetik behin hautatuko lituzkete. Zerrenda irekiak eta itzuli bakarra aurreikusten ditu konstituzio proposamenak.
Bestalde, Kataluniako Banku Zentrala eratzea proposatu dute egileek, finantza sistema arau dezan.
