Diada Herrialde Katalanetako Aberri Eguna da. Joan den urtean, manifestazioa egin zuten Bartzelonan; aurten, independentzia aldarrikatzeko giza katea antolatu du Biltzar Nazional Katalanak (ANC) iparraldetik hegoaldera, irailaren 11rako. Ekitaldi horretan kargudun publikoek izan beharreko papera zehaztu dute urte politiko berriko lehen gobernu kontseiluan.
Artur Mas Kataluniako Generalitateko presidenteak joan den urteko irtenbide bera hartu du: ez du Diadan parte hartuko, baina ANCko ordezkariak jasoko ditu, eta Generalitateko kontseilariek askatasuna izango dute nork bere izenean giza katean parte hartzeko.
