Kolonbiako Gobernua eta FARC-EP gerrilla bake negoziazioak amaitzeko azken txanpan sartuta daude, eta Habanako elkarrizketak hitzarmen batekin amaituz gero, hor jasotako puntuak legedian txertatzeko bidea prestatzen hasiak dira dagoeneko. Kolonbiako Senatuak lehen irakurketan onartu du Konstituzioa erreformatzeko lehen eztabaida. Zortzi eztabaida egin beharko dituzte guztira Senatuan, balizko bake akordioak inplementatu ahal izateko Konstituzioan egin beharreko aldaketak onartzeko.
Kongresuan bakerako batzorde berezi bat sortzea aurreikusten du, batetik, bart gauean bideratutako erreformak, Juan Manuel Santosen gobernuak eta FARCek hitzartutako akordioak lege bihurtzeko; eta Kolonbiako presidenteari 90 egunean ahal bereziak ematea, bestetik, ohiko legeak arauzko epean baino azkarrago onartu ahal izateko.
"Eztabaida honek eta jaso duen onespenak erakusten du Kongresuan gehiengo zabal eta sendo bat badagoela Kolonbian bakearen alde", adierazi zuen Juan Fernando Cristo Barne ministroak.
Kolonbiako Senatuko eztabaida hasi aurretik, Estatuko Fiskaltza Nagusiak Alvaro Uribe presidente ohia ikertzeko eskatu zion Justizia Auzitegi Gorenari, Antioquiako gbernadore izan zen garaian talde paramilitarrak finantzatu eta haiekin kolaboratu ote zuen ikertzeko. Uribe da Kolonbiako Gobernuaren eta FARC gerrillaren arteko bake negoziazioen kontrario gogorrena.
