Gaur egin dute Segolene Royal PSren presidentegaiak eta Francois Bayrou UDFko buruak horrenbesteko ikusmina sortua zuen telebistako eztabaida (BMF katean), eta Bayrouk berearekin segitu du: ez du esan zeinen alde egingo duen maiatzaren 6an Frantziako Presidentetzarako hauteskundeetan. Lehen itzulian hirugarren geratu zen, %18,5eko babesarekin, ia zazpi milioi bota jasota.
Royalek (%25,87 lehen itzulian) "elkarrizketa" deitu dio gaurko saioari, UDFko agintariarekin alde handirik ez duela esan nahian bezala. Baina biek ikuspuntu desberdinak dituztela ikusi da gaur ia bi orduko saioan: Europako Banku Zentralaz (Bayrouk gehiago defenditu du), gutxieneko soldataz (Bayrou Europan gutxieneko soldata bakarra jartzearen aurka azaldu da)...
Nicolas Sarkozy UMPko burua (%31,18), berriz, Valenciennesen dago gaur, Jean Louis Borloo Enplegu eta Kohesio Sozialeko ministroarekin. "Nahiago dut frantziarren erdian egotea", esan du Sarkozyk.
Gaur argitaratu den inkesta baten arabera (Ipsos-Dell enpresak egina), Sarkozyk bozen %52,5 lortuko lituzke bigarren itzulian. Bayrouren aldekoek %35k Royali bozkatuko liokete, %29k Sarkozyri, eta %36k ez dute esan zeini emango lioketen botoa edo abstentziora joko lukete.
Maiatzaren 2an Sarkozyren eta Royalen arteko telebista eztabaida izango da.
Frantzia
Bayrouk ez dio Royali esan bere alde egingo duenik
Ia bi orduko eztabaida egin dute telebistan. Maiatzaren 2an izango da Sarkozyren eta Royalen artekoa.
Iruzkinak
Ez dago iruzkinik
Ordenatu
